Sulaymon hikmatlari
10-BOB
1 Sulaymonning hikmatlari.
Dono farzand otaga shodlik keltiradi,
nodon farzand esa onaga qaygʻu.
2 Yovuzlik bilan topilgan boylikdan naf yoʻq,
toʻgʻrilik esa oʻlimdan qutqaradi.
3 Egamiz solihning och qolishiga yoʻl qoʻymaydi,
lekin fosiqning xohishini bajo qilmaydi.
4 Dangasa qoʻllar qashshoqlik keltiradi,
tirishqoq qoʻllar esa boylik.
5 Yoz paytida hosil yiqqan - dono oʻgʻil,
oʻrim payti uxlagan esa otasiga uyat keltiradi.
6 Solihning boshida - baraka,
fosiqning tili esa yovuzlik konidir.
7 Solihning xotirasi muborak boʻladi,
fosiqning nomi yoddan koʻtariladi.
8 Yuragida donolik boʻlgan amrlarni qabul qiladi,
ezma nodon esa halok boʻladi.
9 Toʻgʻri yurgan xavf-xatarni bilmaydi,
yoʻldan ogʻgan esa jazo topadi.
10 Koʻz qisgan qaygʻuga sabab boʻladi,
ezma nodon halok boʻladi.
11 Solihning tili - hayot bulogʻi,
fosiqning tili - yovuzlik koni.
12 Nafrat janjal qoʻzgʻaydi,
sevgi-muhabbat esa hamma gunohlarni kechiradi.
13 Idroklining soʻzlarida - donolik,
nodonning orqasida esa qamchi.
14 Donolar bilimini orttiradi,
nodonning tili esa halokat keltiradi.
15 Boyning qalʼasi - boyligi,
kambagʻalning halokati esa kambagʻalligidadir.
16 Solihning haqi - hayot,
fosiqniki esa jazo.
17 Nasihatga quloq solgan hayot yoʻlidadir,
tanbehni tan olmagan yoʻldan adashadi.
18 Nafratini yashirgan - yolgʻonchi,
gʻiybat tarqatuvchi ahmoqdir.
19 Gap-soʻz koʻp boʻlsa, janjal hech qachon toʻxtamaydi,
tilini tiygan esa donodir.
20 Solihning tili oltin kabidir,
fosiqning qalbi esa hech narsaga arzimaydi.
21 Solihning tili koʻplarni oziqlantiradi,
nodon esa aqlsizligi tufayli halok boʻladi.
22 Egamizning marhamati boylik keltiradi,
Egamiz boylikka gʻam-tashvish qoʻshmaydi✶.
23 Ahmoq yomonlik qilishdan,
aqlli esa donolikdan zavqlanadi.
24 Fosiq nimadan qoʻrqsa, oʻshanga duchor boʻladi,
solih esa orzusiga yetishadi.
25 Quyundan keyin fosiqlar yoʻq boʻladi,
solihlar esa abadiy mustahkamdir.
26 Dangasaga ish buyursang,
u sen uchun tishga qoʻyilgan sirkaday,
koʻzga kirgan tutunday boʻladi.
27 Egamizdan qoʻrqish umrga umr qoʻshadi,
fosiqning umri esa qisqaradi.
28 Solihning orzusi quvonch keltiradi,
fosiqning niyati esa puchga chiqadi.
29 Egamizning yoʻli solihlar uchun qalʼa,
yomonlik qiladiganlar uchun esa halokatdir.
30 Solih hech qachon oʻrnidan qoʻzgʻatilmaydi,
fosiq esa oʻsha yerda yashamaydi.
31 Solihning tili donolik keltiradi,
yomon til esa kesib tashlanadi.
32 Solihning tili marhamat keltiradi,
fosiqning tili esa egrilik.