Chisυs holitopa ma!
Hatak pilbυsha kυt,
Chishno puyulla hoka
E chi hoho̱yoshke.
Aiokcha̱ya inla mυt
Ik pim iksho hocha,
Chisυs chia fehna ka
E chi anukchetoshke.

Hatak yoshoba yoka
Ish i nukha̱klo cha,
Ont okchalinchi lashke;
Ish aiahni hokυt,
Chim aholitopaka
Issυt ish minti hosh,
Yakni lu̱sa ilυppa
Ish la tok oke.

Hatak yoshoba yokυt
Aiokpuloka ma
Ihi̱ya pulla chi̱ ma,
Ish i̱ nukha̱klo mʋt,
Hatak pishno chohmi ho
Ish toba tuk ocha,
Ilbaiyυsha fehna hosh
Ish anta tok oke.

Hatak oklu̱ha hoka
Im aiyubali lish,
Ai okcha̱ya he kia
Im ihi̱kbi lashke,
Ish aiahni tok oke:
Yʋmohmi tuk mak o̱,
E chi holitoblishke;
Chisʋs pi̱ Shahli ma!

Yakmiht ish apesa tok
"Hatak okpulo ʋt
Okcha̱ya he mak ona
Ʋlhtobʋt sʋllashke;
Ʋno ak inli hokʋt
Hatak yoshoba ya̱
Sʋssish pulla hokʋno
Isht chumpa lashke."

Ik yohmi nana kia,
Ish aiahni tuk osh,
Chisʋs chia pulla kʋt
Ilbʋshʋt chilli tok.
Chi̱ nukkilli hatuk osh
Hatak ʋt chibi tok;
Yohmi ik nana tok kia,
Chi ocha̱ya moma.

Nitak ont atuchina
Ile okchalinchit,
Chihowa chia hokʋt
Ish tani tok oke:
Aiokcha̱ya chia hʋt,
Chi̱ yakni ʋba ya̱
Ont ish ahanta hocha,
Ish bilia hoke.
PAUSE

Chisʋs pi̱ Shahli hokʋt
Ʋba Mi̱ko yoke;
Achukma fehna hoka,
Il aiokpanchashke.
Pichu̱kʋsh fehna hoka
Il ema pulla cha,
Pim anukfila momint
Isht il ahninchashke.

E yʋmohmi pullakma,
Chisʋs pi̱ Shahli hʋt
Et pi halʋlli pullʋt,
Pi okchalincha he.
Chisʋs ai ahanta ka
Yʋmma il onakmʋt,
Nan isht ilaiyukpa hosh
Il a̱sha hi oke.